„СИВЕЦ ВАЛАЛ У ШТИРОХ ШОРОХ ЗОЗ ДАЛЄКА НА ВАРОШ ЗДАБЕ“

Тот сказковити бетярац, хтори ше од давних часох шпива, гутори нам же ше роби о вельким населєню. И наисце, Сивец єден з найвекших валалох зоз коло дешец тисячи жительох, змесцени помедзи „сладку Червинку“ и боемского Зомбора, густо пошати на схилох телечковей висоровнїни.

Фолклорни ансамбл Дома култури тирва уж пол вика, а його наступи и успихи як ланцущок з перлох ше предлужує по нєшкайши днї. Од дзецинскей по жридлову ґрупу, мушки и женски ґрупи, шпивацко-танєчно-ґлумецки дружтва, солистох, инструменталистох по оркестри з традицийнима инструментами – ґайдами, пищалку, самицу, тапаном и тамбурками – шицки вєдно на єдиней драги чуваня традициї и обичайох сербского народу.

Гевто по чим ше Сивец препознава, а вязано за културу, вшелїяк и два фестивали, хтори тирваю уж вельо роки. Перши то ФАМУС (Фестивал акустичарскей музики у Сивцу), права аматерска перла хтора настала 1977. року, а тирва и нєшка. Вон зазберує и промовує младих творительох и дава порив у їх перших крочайох на дальшу активносц зоз обласци акустичарскей музики. Други, настал 1999. року, чува традицию войводянских Сербох старобивательох. То „Иваньске квеце“. Каждого шестого юлия, уж длуги роки ше зазберуєме коло того єдинственого Фестивалу, хтори постал нашлїднїк войводянских Сербох старобивательох. Сримци, Банатянє и Бачванє ту указую же цо зачували од забуца, шицко ше призначує, фотоґрафує и знїма, а наша войводянска заградка вше векша и цифрованша. У конкуренциї коло сто валалских програмох, наш Фестивал у 2010. року у рамикох манифестациї „Роґаль“ достал Златну плакету. Новини „Дньовнїк“ и „Ґаздовство“, и їх ушорйоваче и читетелє, препознали вредносц и значенє постояня такого Фестивалу и додзелєли му престижну награду.

Того року Дом култури розвил и цошка цалком нове на културней сцени општини – народзени Фестивал шмиху. Преполна сала одгуковала з шмеяньом, а коментари ТВ патрачох (ТВ „Щесца“ и Кулска телевизия) даваю нам за право же бизме предлужели далєй. Ту нам бависка, а будзе озда и хлєба.

Театрална секция „Велимир Сандич-Велько“, Дома култури Сивец, ма даскельо квалитетни представи, хтори обишли велї места ширцом Войводини и Сербиї („Клаустрофобична комедия“, „Адвокат Патлен“, „Ковалє“, „Панї Министерка“…). Алє на першим месце вшелїяк, комедия „Гайзибан“, хтора бешедує о зраженю менталитетох колонистох зоз Чарней Гори и гражданох Сивцу. Тота животна приповедка приводзи од слизох по шмих патрачох у преполних салох. Представа прейґ видео касетох, а потим и ДВД записох оддавна пошла споза гранїци нашей жеми. Єдна з остатнїх представох то „Панї министерка“, хтора после вецей рокох по перши раз позберала вельки ансамбл и дала можлївосц, за вельки (по числу ґлумцох) проєкти хтори шлїдзели.

Гевто зоз чим ше окреме пишиме, то формованє дзецинскей театралней секциї у рамикох секциї „Велимир Сандич-Велько“, хтору предводзи вецейрочни ґлумец аматер Желько Вараґич.

Того шицкого би нє було, кед би нє бул формовани тим занятих у хторим шицки робя скоро шицко – бавя, граю, шпиваю, танцую…

Вони предводза и праву армию аматерох, їх прейґ 300, чуваюци традицию и подзвигуюци културни уровень у своїм штредку, та и ширше.