Фестивал акустичарскей музики у Сивцу – ФАМУС формовани 1977. зоз цильом же би промововал акустичне гранє и дало афирмацию младим, талантованим музичаром и композитором. Задумани є як змагательни, а учашнїкох оценює фахови жири (познати музичаре, писателє, новинаре, ґлумци…)
Порушал го Максим Мудринич з помоцу сивецких музичарох ентузиястох и Домом култури Сивец. Скорей формованя ФАМУС-у, Максим Мудринич бул фронтмен „Макси“ ґрупи, хтора уж теди за собу мала коло трицец тонски записи и даскельо гити. Їх шпиванки ше могли чуц на зомборским радию, дзе ушорйоваче були Брана Плавшич и Зденко Бакич и без подозривосци, зоз своїм квалитетом скруцовали повагу на себе. После даскелїх нєуспишних пробованьох же би вошли на „Младежски фестивал“ у Суботици, Мудринич обдумує концепт будуцого фестивалу у Сивцу, зоз хторого ше барз швидко народзи ФАМУС. Парола (поднаслов) фестивала ше од 1977. та по нєшка затримала: „У мено музики, любови и приятельства“. На „кридлох“ тей пароли велї у наиходзацих рокох злєцели на ФАМУС и полєцовали зоз нього одушевени.
Гоч початок бул барз чежки, фестивал барз швидко нашол свою драгу. Од дзешец змагательох першого року, углавним з подруча Войводини, барз швидко ше пришло по 60-70 прияви за наступ на фестивал, так же число одобрених композицийох було коло трицец.
Потримовку дали Радио Зомбор, Радио Суботица (Франьо Пинтер), Радио Кула, емисия „Рандеву зоз музику“ (Боґица Миятович и Вита Симурдич), Петар Янятович, Телевизия Нови Сад, велї институциї, спонзоре… Пановало вельке интересованє за фестивал, учашнїки приходзели зоз Беоґраду, Нового Саду, Нишу, Суботици, Зомбора, Заґреба, Риєки, Задру, Сараєва, Мостару, Любляни, та аж и Мадярскей. Квалитет нє приводзени до питаня, а до прилогу идзе факт же побиднїк ФАМУС-у автоматски бул пласовани на „Младежски фестивал“ у Суботици, хтори за велїх бул нєдосяжни. Була и награда у форми безплатного студийного албуму, як и даяки мали награди (музични инструменти) и плакети.
Так ФАМУС у осемдзешатих рокох 20. вику, направел себе широку драгу по хторей ишли велї, аж и даєдни нєшка познати музичаре: Александар Барац, Мая Николич, Слободан Тркуля… Цикаве, поведзме, же ґрупа „Драгоказ“ зоз Риєки побила на ФАМУС 1989., а лєм рок познєйше, з пременєним меном до „Ени“, представяла Горватску на Евровизиї. Славко Матич, фронтмен ґрупи „Збогом Брус Ли“, тиж бул учашнїк…
Побиднїк першого ФАМУС-у була „Макси“ ґрупа, а замерковани резултати мали и на шлїдуюцих трох участвованьох. После того, Максим Мудринич престава буц виводзач и у подполносци ше пошвецує фестивалу и його унапредзеню, та 1981. року постава Уметнїцки директор фестивала. Тих осемдзешатих рушаю, мож повесц, златни часи ФАМУС-у…
Кед у питаню госци ФАМУС-у и фахово особи жирия, муши ше повесц же їх число вельке и же вони шицки дали огромни печац цалому концепту, як и задаток и обовязку же фестивал муши затримац озбильни уровень у смислу квантитету и, окреме, квалитету.
Даєдни з нїх то: Йован Адамов, Петар Янятович, Пеца Попович, Боґица Миятович, Франьо Пинтер, Славко Матич („Збогом Брус Ли“), Слободан Тркуля, Бане Костич, писатель Душко Трифунович, Бора Чорба, Влада и Байка, Люба Нинкович, Деян Цукич, „Абсолутно романтичне“…
Вшелїяк, було видзвигованя и було паданя и злих войнових часох… Фестивал ше, заш лєм, одупар шицкому подлому и указал же є и далєй моцни и же акустична музика нє умарла. У остатнїх даскелїх рокох, пре подлу „културну“ инфраструктуру, фестивал церпи, алє и попри того му ше удава затримац достоїнство и угляд. Ознова зме обновели контакт зоз „Младежским фестивалом“ и обезпечуєме стимуланси за младих музичарох и ознова нам приходза госци зоз Банялуки, Любляни, Заґреба, Задру… Дом култури, як найвисши швицарнїк културного скарбу и сучасней уметнїцкей творчосци нашого Сивцу, наисце ше намага зоз шицкима моцами же би ФАМУС бул вични символ „Музики, любови и приятельства“, як цо то вше и бул, и же би бул на високим уровню хтори, гоч цо злонамирни дилетанти бешедовали, дефинитивно заслужує. Указало ше…